Fy enw i yw Ffion, ac rwy’n artist amlddisgyblaethol arobryn sy’n byw yng Ngogledd Cymru. Mae gen i ddiddordeb yn y ffordd y gall celf fod o fudd i gymdeithas, boed hynny drwy gelf sy’n ymgysylltu â’r gymuned, celf mewn gofal iechyd neu drwy bŵer cathartig adrodd straeon, hiwmor ac adloniant. Ar ôl hyfforddi fel darlunydd, a graddio o Brifysgol Brighton gydag anrhydedd dosbarth cyntaf yn 2017, mae fy ymarfer wedi aros yn eang ac eclectig, gan ymestyn ar draws sawl disgyblaeth. Rwyf wedi cael y fraint o weithio’n rhyngwladol ar lu o brosiectau, gyda’r uchafbwyntiau’n cynnwys cynrychioli Urdd Gobaith Cymru yn Washington DC ar ddarn celf gyhoeddus, a bod yn rhan o dîm goruchwylio Cymru yn Fenis yn Biennale Fenis yn 2019. Er hyn mae fy nghalon yma yng Nghymru, lle rwy’n cyfrannu at y gymuned drwy gelf sy’n ymgysylltu’n gymdeithasol a thrwy waith cefnogaeth greadigol. Ym mis Medi, byddaf yn dechrau MA mewn Ymarfer Celfyddydau: Celf, Iechyd a Lles ym Mhrifysgol De Cymru.
Mae’n anrhydedd i mi fod yn gweithio gyda Scene & Word/Cofio Jonah Jones ar gyfres o weithdai yn yr Eisteddfod Genedlaethol yn Wrecsam. Deuthum ar draws gwaith Jonah Jones gyntaf yn ystod fy astudiaethau israddedig. Roedd adran Dylunio Graffig a Darlunio Brighton yn seiliedig iawn ar grefft, ac yn ein hannog i ddysgu dulliau crefft, fel argraffu a phrintysgrifennu, er mwyn llywio ein hastudiaethau. Dydw i ddim yn grefftwr dawnus o gwbl, ond rwy’n dal i feddwl am yr ystafell brintysgrifennu bob tro rwy’n agor InDesign, ac yn credu’n gryf fod dysgu’r sgiliau hyn wedi fy helpu i ddatblygu yn gyffredinol fel artist. Ar ôl cael fy nghyflwyno i’r ystafell brintysgrifennu, cafodd fy chwilfrydedd ei danio ac roeddwn i eisiau edrych ar draddodiadau llythrennu crefft yn deillio o fy nghartref yng Nghymru. Yn y pen draw, des i o hyd i wyddor wedi’i law-lythrennu gan Jonah Jones a syrthio mewn cariad â hi! Mewn ffordd, mae’r stori hon yn dangos fy nghariad at ddulliau a chrefft traddodiadol, a’r perthnasedd y mae artistiaid fel Jonah Jones yn parhau i gael ar artistiaid a gwneuthurwyr pob cyfrwng. Roeddwn i eisiau dal hyn yn y gweithgaredd a osodais ar gyfer gweithdai’r Eisteddfod, gan gyfuno cyfryngau analog a digidol, a dangos perthnasedd parhaus Jonah Jones trwy greu darnau celf na allai ond gael eu gwneud heddiw! Rwyf mor gyffrous i ddechrau cynllunio, arbrofi a chreu, ac i hwyluso gweithdai sy’n gwneud cyfiawnder go iawn ag artistiaid a chrefftwyr fel Jonah Jones a arloesodd y ffordd i artistiaid yng Nghymru.
Gweithdai
Oedolion:
Dydd Llun 4ydd Awst 13:30
Teuluoedd/plant gyda oedolyn:
Dydd Iau 7fed Awst 12:00
Oedolion:
Dydd Gwener 8fed Awst 14:00
yn Y Lle Celf